Warning: Missing argument 2 for JCacheControllerPage::store(), called in /home4/chintv/public_html/plugins/system/cache/cache.php on line 110 and defined in /home4/chintv/public_html/libraries/joomla/cache/controller/page.php on line 122
Chin TV International

Thlisia le nikhuasia tik ih humhim aw dan
(Storm Safety)

Ramthar le hmun thar ih kan um tikah, humhim aw nak ih  theih ṭul mi pawl tampi an um. Indiana lawng si lo in, USA sung ih state tampi ah thlisia (tornadoes) le nikhuasia ruangih inn le lo lawng si lo in, minung nunnak tiang lak sak in kumtin a um. Hivek nikhua sia le tihnung a tleng tikah, nikhua tahnak zung lam ihsin humhim aw nak ding ah warning an pek cia theu.

 

Nikhua tahnak zung lam ihsin, warning an pek tikah, an sim mi area sungah thlisia hran, ṭektlak, rial tlak le ruah nasa zetin a sur ding  ti a kawh hmuh.

Thlisia le nikhuasia tik ih humhim aw dan

Nikhua tah nak zung lam ihsin, thlipi le ruahpi a ra ding ti a si ah cun, an sim mi area ah cuvek a cang rero zo tinak khal a si theu. Hivek nikhua zoh thei nak radar in khuailam ah thlipi le ruahpi a feh vivo ti an zoh vivo thei a si.

Tornado timi thlipi hran a suak thei tiih, warning pek nak in, hivek thlipi a hran zik rero timi a kawh hmuh.

Tornado warning in, tornado thlipi cu lei parah a um rero zohih, a kiangkap ih um pawl hrangah ṭihnung zia a si ti a lang tir. Nikhua zoh nak radar khal in khuailam ah cuvek thlipisia a hrang ding timi theih cia thei a si ih, cumi theicia nak in, minung pawl humhim aw thei ding in caan kan nei.

Hivek warning pek nak pawl le rak theicia nak pawl cu a phunphun in ngah thei an si. Hivek theicia theinak lakih, a ṭhabik mi pakhat ve cu NOAA timi nikhua hrang ih tuahmi radio a si. Man awl ten Radio Shack, Target, Meijer lole electronic thilri zuarhnak ah lei theih an si.  Radio ih ṭongmi  kan  thei lo khal le, hi vek warning cu reipi a awn dingih, theihthiam thei a si ko. Cumi sungah na um nak kiangkap ah ziang a cang timi hlithlai nak hrang caan na nei ko ding.

Na um nak khua ih TV station pawl khal in, hivek caan ah cun, simthan nak thupi zetin an tuah ve. Ṭong na theithiam lo le khal nikhua zoh nak radar ihsin, lem pawl an lang dingih, na um nak lam ah a ra le ra lo na thei thei ding.

Hivek tikcu caan ih, awn ṭheu mi “Emergency weather siren” khal na um nak kiangkap ah a um ding.  Hivek ih thlisia nasa zetin a hran ding tikah, cumi thil awn cu ring zetin reipi awn tir a si ṭheu. Cumi in a ṭul vekin, humhim aw nak tuah dingah warning a pek. Reipi a awn hnuah a cawl sal ding. Cumi a cawl tikah, nikhua a tha sal  tinak a si lo ti kha theih ding a si. Na TV kha ong ringring aw la, nikhua zohnak radar kha zoh aw. Thu theihnak le timlam nak cu nangmah le na sungkua humhimaw nak ih thabik a si.

Khuivek si humhim aw nak ih thabik nak hmun tin thu sut nak a um thei. Hivek thlisia a hran tikah, a him nak bik hmun cu, leihnuai, basement pawl an si. Ziang tik khalah, thil kuai thei le thil zum mi kiangkap ah um lo ding. Basement nan inn ah a umlo a si le, na um nak inn ih, a niambik nak hmun le room fatebik nak zuninn, closet lole utility room tivek ah um tum aw. Inn a sawnghnih nak ah umlo ding. Inn tlun lam ih um cu thlisia le ṭektlak tikah, ṭih a nung bik cuang.

Mawtaw na mawng lai ah, tornado timi thlisia a hran a si le, mawtaw in suak lohli in, a niambik nak hmun na hmuh nakah feh tum aw. Na mawtaw kha, thlipi nih thilzang te pakhat vekin, thli lakah a lakhlo thei ruangah mawtaw sungih um kha a him lo. Lilawn tang/hnuai lam tivek khalah beunak lakin, na um thei thotho.

Hivek nikhua sia caan ih hman dingmi ṭul pawimawh mi thil pawl, “emergency kit”an timi ṭul pawimawh zual deuh pawl hmun khat ah ret cia a tha. Cumi pawl tla cu ei le in, tidai, sii le thildang, nazi 72 sung tal nan sungkua lo daih dingmi pawl an si. News pawl ah hivek nikhua sia ih, ṭihnung zia le thil tih siat theizia pawl hmuh theih an si. Hivek in thlisia le ruahsia ruangih thil a cang tikah, palik, firemen le a dang bawmnak petu pawl ra thei dingin, nazi 72 sunglai can pek a ṭul ṭheu. Hivek in Joplin khua, MO state khal ah naza zetin a rak cang dah zo. Curuangah “emergency kit” timi ṭul pawimawh mi thilri pawl neihcia le retcia ding a thupi zet.

Hivek nikhua ṭihnung can a thleng tikah, timlam aw cia in humhim aw tum ringring ding a si. Warning pek nak ih a tihcan le a san pawl theih tum ding khal a si. Na sungkua le na inn kiangkap um mi pawl thawn thurawn aw cia in hivek tikcu caan a tleng tikah, ziangtin tuah ding timi timlam aw nak nei cia ding a si.

Go to top